CARLES, ILOILO — Duha ka mag-abyan ang patay matapos nga nagbangga ang ila ginasakyan nga motorsiklo sa waiting shed sa Barangay Tarong, Carles, Iloilo pasado alas-12:00 sang kaagahon, Hunyo 17, 2026.

Ginkilala ang mga biktima nga si alyas "Jem", 24-anyos, driver kag residente sang Barangay Dayhagan, Pilar, kag angkas sini nga si alyas "Ren", 21-anyos, residente sang Barangay Tarong, Carles.

Suno sa interview sang Carles PNP sa duha ka utod sang biktima nga sanday alyas "Poy" kag alyas "An", nagpakadto sa barrio Tarong ang duha para magbakal sang sigarilyo. Pag-abot sa blind curve ukon kubadahon nga bahin sang karsada, indi na ma-kontrol ni Jem ang motorsiklo kag diresto nga nagbunggo sa waiting shed sa atubang sang Tarong Elementary School.

Tungod sa kadasigon sang padalagan kag ginasuspetsahan nga yara sa impluwensya sang makahulubog nga ilimnon, grabe ang impact sang pagbunggo. Naka-angkon sang fatal nga pilas sa ulo kag iban nga parte sang lawas si Jem kag gilayon nga napatay sa lugar. Si Ren naman naka-angkon sang fatal nga pilas sa ulo, bali nga abaga, kag iban pa nga injuries.

Gilayon nga nagresponde ang Carles PNP personnel kag Carles Emergency Response Team. Gindala ang duha sa Jesus M. Colmenares District Hospital apang gin-deklarar nga dead on arrival si Jem sang attending physician. Si Ren gin-refer pa sa syudad sang Iloilo apang napatay man sulod sang ambulansya samtang padulong sa ospital.

Sa subong, ang mga bangkay sang duha ka biktima yara na sa punerarya para sa nagakaigo nga disposisyon.

Labels para sa post: News, Carles, Accident, Pilar, Iloilo, Road Crash, Tarong

Photo Caption:

Waiting shed sa atubang sang Tarong Elementary School nga ginbunggoan sang motorsiklo. 📸 File Photo

Source: Carles PNP | Zarraga News Live Station